Neeraj Chopra

 

చరిత్ర సృష్టించిన నీరజ్ చోప్రా.. నెరవేరిన భారత్ 100 వందేళ్ల కల

 

🔹స్వర్ణ పతకం గెలిచినా నీరజ్ చోప్రా
🔹ఒలింపిక్ స్టేడియంలో 13 ఏళ్ల తర్వాత వినిపించిన జనగణమన గీతం
🔹దేశమంత సంబరాలు, ప్రముఖుల ప్రశంసలు

 

టోక్యో/న్యూఢిల్లీ (ప్రశ్న న్యూస్) అద్భుతం జరిగింది. ఊహకు కూడా అందని అద్భుతం అది.. ఐదు, పదేళ్లు కాదు.. వందేళ్ల కల నిజం చేశాడు నీరజ్ చోప్రా.. టోక్యో ఒలింపిక్స్‌లో భారత్‌కు తొలి స్వర్ణం అందించిన అథ్లెటిక్ వీరుడిగా చరిత్రలో నిలిచాడు. ఒలింపిక్స్‌లో భారత్‌ వందేళ్ల కల నెరవేరింది. అథ్లెటిక్స్‌లో తొలిసారి పతకం వచ్చింది. టోక్యో ఒలింపిక్స్‌లో జావెలిన్ త్రో విభాగంలో నీరజ్ చోప్రా చరిత్ర సృష్టించాడు. ఏకంగా గోల్డ్ మెడల్ గెలిచి.. యావత్ దేశాన్ని సంబరాల్లో ముంచాడు. 100 ఏళ్ల తర్వాత ఒలింపిక్ పతకం సాధించిన ఇండియన్ అథ్లెట్‌‌గా రికార్డులకెక్కాడు. జావెలిన్ త్రోలో ప్రత్యర్థులెవరూ నీరజ్ చోప్రా దరిదాపుల్లోకి కూడా రాలేదు. మొదటి అవకాశంలోనే 87.03 మీటర్ల దూరం ఈటె విసిరి అందరినీ ఆశ్చర్యపరిచాడు. ఆ తర్వాత రెండో అవకాశంలో మరింత మెరుగ్గా 87.53 మీటర్లు విసిరాడు. మూడో ప్రయత్నంలో 76.79 మీటర్లకు పరిమితం అయ్యడు. ఆ తర్వాత రెండుసార్లు ఫౌల్స్ పడ్డాయి. ఆరో రౌండ్‌లో 84.24 మీటర్ల దూరం జావెలిన్ విసిరాడు. పోటీలో ఉన్న ఆటగాళ్లందరికీ ఆరు అవకాశాలు ఉంటాయి. అందులో అత్యుత్తమ ప్రదర్శనను పరిగణలోకి తీసుకుంటారు. ఇలా అందరిలోనూ అత్యధిక దూరం జావెలిన్ విసిరింది మన నీరజ్ చోప్రానే. ఏకంగా 87.53 మీటర్లు విసిరిన ఆటగాడిగా నిలిచి గోల్డ్ మెడల్ సాధించాడు. ఇక చెక్‌ రిపబ్లిక్‌కు చెందిన జాకూబ్‌ (86.67 మీటర్లు)కు రజతం దక్కింది. అదే దేశానికి చెందిన మరో అథ్లెట్‌ విటెడ్జ్‌స్లావ్‌ (85.44 మీటర్లు) కాంస్యం గెలిచాడు. నీరజ్ చోప్రా గోల్డ్ గెలవడంతో దేశమంతటా సంబరాలు జరుగుతున్నాయి. టోక్యో భారత్‌కు స్వర్ణం అందించిన ఒకే ఒక్కడు అంటూ దేశప్రజలంతా ప్రశంసల్లో ముంచెత్తుతున్నారు. ముఖ్యంగా హర్యానాలో పండగ వాతావరణం నెలకొంది. ప్రతి ఒక్కరూ ఈ విజయాన్ని సెలబ్రేట్ చేసుకుంటున్నారు. హర్యానా హోంమంత్రి అనిల్ టీవీ చూస్తూ డాన్స్ చేశారు. వ్యక్తిగత విభాగంలో అభినవ్ బింద్రా తర్వాత గోల్డ్ మెడల్ సాధించిన రెండో భారతీయుడిగానూ రికార్డులకెక్కాడు నీరజ్ చోప్రా. 2008 బీజింగ్ ఒలింపిక్స్‌లో అభినవ్ బింద్రా స్వర్ణపతకం సాధించాడు. ఆ తర్వాత ఇప్పటి వరకు గోల్డ్ మెడల్ రాలేదు. మళ్లీ ఇన్నేళ్ల తర్వాత భారతమాత మెడలో బంగారం పతకాన్ని వేశాడు నీరజ్ చోప్రా.
టోక్యో ఒలింపిక్స్‌లో భారత్‌కు మొత్తం ఏడు పతకాలు వచ్చాయి. జావెలిన్ త్రోలో గోల్డ్ మెడల్ వచ్చింది. మహిళల వెయిట్‌లిఫ్టింగ్ విభాగంలో మీరాబాయి చానుకి రజతం, రెజ్లింగ్‌లో రవికుమార్ దహియా రజత పతకాలు గెలిచారు. ఇక బ్యాడ్మింటన్‌లో పీవీ సింధు, బాక్సింగ్‌లో లవ్లీనా, పురుషుల హాకీ జట్టు, రెజ్లింగ్‌లో బజ్‌రంగ్ పునియా కాంస్య పతకాలను గెలిచారు. 2012 లండన్ ఒలింపిక్స్‌లో భారత్ ఆరు పతకాలను సాధించగా.. ఆ రికార్డను ఈసారి అధిగమించింది భారత్. ఈసారి టోక్యోలో భారత్ పోటీ ప్రారంభమైన రోజే మీరాబాయి చాను రజతం గెలవగా.. ముగింపు రోజున స్వర్ణం గెలిచాడు నీరజ్ చోప్రా.

Related posts:

మోదీ కన్నీళ్లు ప్రజల ప్రాణాలను కాపాడలేవు
జగనన్న పచ్చతోరణంకు శ్రీకారం..
3 లక్షల జాబ్స్ ఎక్కడ..? - షర్మిల
నా తుదిశ్వాస వరకు, ప్రశ్నిస్తూనే వుంటా - జర్నలిస్ట్ రఘు
బండి సీజ్ చేసే అధికారం పోలీసులకి లేదు, అదంతా అబద్ధం..
బావిలో కార్యాలయం, బోర్డుకు లేదు ఆదాయం
గోల్కొండ కోటపై త్రివర్ణ పతాకాన్ని ఆవిష్కరించిన సీఎం కేసీఆర్
దళిత ఉద్యోగులకు కూడా దళిత బంధు..