ముంబై, కోల్కతా, చెన్నై, బెంగళూరు, హైదరాబాద్ వంటి మెగా మెట్రో సిటీల అభివృద్ధికి తీసుకోవాల్సిన చర్యలపై కేంద్రం దృష్టి సారించాల్సిన అవసరం ఉందని కెసిఆర్ పేర్కొన్నారు. హైదరాబాద్ అభివృద్ధికి తీసుకోవాల్సిన చర్యలపై కేంద్రానికి నివేదిక ఇచ్చామని పేర్కొన్న కేసీఆర్, ఈ నగరాలను బాగు చేయాల్సిన అవసరం ఉందని కానీ కేంద్రం పట్టించుకోవడం లేదని కేంద్రం తీరుపై మండిపడ్డారు. అవసరమైతే కేంద్రంపై పోరాటం చేయడానికి సిద్ధంగా ఉన్నామని కేసీఆర్ పేర్కొన్నారు. కేంద్రం ప్రజావ్యతిరేక విధానాలను అనుసరిస్తోందని మండిపడ్డారు. కేంద్రం నుంచి రాష్ట్రాల అభివృద్ధికి ఎలాంటి స్పందన రావడం లేదని సీఎం కేసీఆర్ ధ్వజమెత్తారు. అంతేకాదు పెట్రోల్, డీజిల్ పై వచ్చే ఆదాయాన్ని కూడా తీసుకునేందుకు కేంద్రం ప్రయత్నిస్తోందని ఆయన మండిపడ్డారు. కేంద్రం ప్రతిపాదనను బిజెపి పాలిత రాష్ట్రాలు కూడా తీవ్రంగా వ్యతిరేకించాయని పేర్కొన్న సీఎం కేసీఆర్ తమిళనాడు సీఎం స్టాలిన్ తనకు లేఖ రాశారని, కేంద్రం అనుసరిస్తున్న విధానాలపై ఆ లేఖలో ప్రస్తావించారు అని పేర్కొన్నారు. అవసరమైతే కేంద్రంపై పోరాటానికి సిద్ధమని సీఎం కేసీఆర్ స్పష్టం చేశారు. గతంలో కాంగ్రెస్ అనుసరించిన విధానాలను ఇప్పుడు బిజెపి అనుసరిస్తోందని ధ్వజమెత్తారు.సీఎం కేసీఆర్ రాష్ట్రాల పరిధిలోని వాటిపై అధికారాలను కేంద్రం లాక్కుంటోందని, కాంగ్రెస్ హయాంలో పెట్టిన పథకాల పేర్లు బిజెపి మారుస్తోందని, తమవిగా ప్రచారం చేస్తుందని విమర్శించారు. జిఎస్టి పేరుతో రాష్ట్రాల నుండి డబ్బులు తీసుకుంటున్నా, తిరిగి కేంద్రం నుంచి రాష్ట్రాలకు ఎలాంటి నిధులు రావడం లేదని సీఎం కేసీఆర్ తీవ్ర విమర్శలు చేశారు. ఏడేళ్లలో తమ ప్రభుత్వం పట్టణ ప్రగతి, గ్రామీణ ప్రగతికి ఎంతో చేసిందని అసెంబ్లీ వేదికగా లెక్కలు చెప్పారు ముఖ్యమంత్రి కేసీఆర్.