హైదరాబాద్ (ప్రశ్న న్యూస్) వినువీధిలో చరిత్రాత్మక ఘట్టం ఆవిష్కృతమైంది. వర్జిన్‌ గెలాక్టిక్‌ అంతరిక్షయాత్ర విజయవంతమైంది. ఆరుగురు సభ్యుల బ్రాన్సన్‌ బృందం రోదసీ యాత్రను విజయవంతంగా పూర్తి చేసుకుని  దాదాపు 90 నిమిషాలకు తిరిగివచ్చారు. తెలుగమ్మాయి బండ్ల శిరీష చరిత్ర సృష్టించారు. అంతరిక్షయానానికి వెళ్లి క్షేమంగా తిరిగొచ్చారు. కల్పనా చావ్లా, సునీత విలియమ్స్‌ తర్వాత అంతరిక్షయానం చేసిన భారత సంతతి మహిళగా గుంటూరు జిల్లాకు చెందిన బండ్ల శిరీష చరిత్ర పుటలకు ఎక్కారు. న్యూ మెక్సికో నుంచి వర్జిన్ గెలాక్టిక్ సంస్థ వ్యోమనౌక వీఎస్ఎస్ యూనిటీ 22 ఆదివారం నింగిలోకి దూసుకెళ్లింది. వ్యోమనౌకలో తెలుగమ్మాయి బండ్ల శిరీషతో సహా ఆరుగురు స్పేస్ ఫ్లైట్ యూనిటీ 22లో వెళ్లారు. వాతావరణ మార్పుల కారణంగా గంటన్నర ఆలస్యంగా వ్యోమ నౌక బయల్దేరింది. బండ్ల శిరీష ఫ్యామిలీది ఆంధ్రప్రదేశ్‌లోని గుంటూరు జిల్లా కాగా, ఆమె తల్లిదండ్రులు డాక్టర్ అనురాధ, డాక్టర్ మురళీధర్‌రావు చాలా ఏళ్ల క్రితమే ఈ కుటుంబం అమెరికాలోని హ్యూస్టన్‌ నగరంలో స్థిరపడ్డారు. పర్‌డ్యూ విశ్వవిద్యాలయం నుంచి ఏరోస్పేస్ అండ్ ఆస్ట్రో నాటికల్ ఇంజనీరింగ్లో శిరీష పట్టభద్రురాలు అయ్యారు. జార్జ్ వాషింగ్టన్ యూనివర్సిటీలో ఎంబీఏ పూర్తి చేసిన అనంతరం.. 2015 నుంచి వర్జిన్ గెలాక్టిక్‌లో ప్రభుత్వ వ్యవహారాలు, పరిశోధన కార్యకలాపాల విభాగానికి ఉపాధ్యక్షురాలిగా వ్యవహరిస్తున్నారు.

అంతరిక్ష టూరిజం

అంతరిక్షయానికి వెళ్లే ముందు బండ్ల శిరీష ట్వీట్ చేశారు. ‘‘అంతరిక్షయానాన్ని అందరికీ అందుబాటులోకి తీసుకురావాలన్న లక్ష్యంతో పనిచేస్తున్న కంపెనీలో, యూనిటీ-22 సిబ్బందిలో భాగస్వామి కావడాన్ని అత్యంత అదృష్టంగా భావిస్తున్నాను’’ అని పేర్కొన్నారు. ఇక, ఈ అంతరిక్ష ప్రయాణంలో వర్జిన్‌ గెలాక్టిక్‌ సంస్థ వ్యవస్థాపకుడు రిచర్డ్‌ బ్రాన్‌సన్‌ టికెట్‌ కొనుక్కొని యాత్ర చేస్తున్న ఒక ప్రయాణికుడిలా వ్యవహరించనున్నారు. భవిష్యత్‌లో వెళ్లబోయే అంతరిక్ష పర్యాటకులకు ఆ యాత్ర జీవితకాల అనుభూతిగా మిగిలిపోయేలా చూసేందుకు అవసరమైన మార్గాలను ఆయన అన్వేషిస్తారు. ఈ యాత్రలో అందరూ సురక్షితంగా ఉండేలా చూడాల్సిన బాధ్యత వర్జిన్‌ గెలాక్టిక్‌ ముఖ్య వ్యోమగామి శిక్షకురాలు బెత్‌ మోసెస్‌ది. వ్యోమనౌకలోని క్యాబిన్‌ పనితీరును పరిశీలించి, భవిష్యత్‌లో చేపట్టాల్సిన ఆధునికీకరణలను గుర్తించే బాధ్యత ముఖ్య ఆపరేషన్స్‌ ఇంజినీర్‌ కాలిన్‌ బెనెట్‌ది. భవిష్యత్తులో అంతరిక్ష పర్యాటకానికి మార్గం సుగమం చేస్తుందని భావిస్తున్నారు. ఈ నేపథ్యంలో చాలా మంది ఇప్పటికే వర్జిన్‌ గెలాక్టిక్‌కు 2.5 లక్షల డాలర్ల చొప్పున చెల్లించి తమ సీట్లను రిజర్వు చేసుకోవడం గమనార్హం.